Kurs + Familiedag

Her er det Lone som sloddar åkeren, Tjalve og Birk går i to-spann.

Kurset var på stall Bjørstad i Valldalen, fred 15. og laurd 16. juni 2018, eit innhaldsrikt kurs i triveleg miljø. Fjordhestlaget vårt fekk frifondsmidlar av Norges fjordhestlag, meint for bruk til beste for barn og unge ilag med fjordhest. Vi inviterte derfor den kjende og svært flinke kusk og instruktør Martin Kjønsberg til dette kurset, og fokuset var "bruk av gammalt hesteredskap". På heimgarden til Kristin har slike redskapar vore tatt godt vare på, og desse vart no brukte.

Det er viktig for oss å lære meir om dette for å kunne videreføre kunnskapen vår til barn og unge i laget vårt. 

Stjerna til Lone er ei 15 år gammal hoppe som ikkje har vore køyrd med vogn sidan Lone kjøpte ho som unghest. Ho hadde eit ønske om å prøve ho for vogn under kurset, og instruktør Martin Kjønsberg meinte dette var ei oppgåve han ville overlate til Oddmund. 

Etter ei økt i rundpadocken, så litt tilvenning og forarbeid rundt vogna, vart Stjerna satt føre vogna og køyrde fint rundt inne i hallen med Oddmund som kusk.

Lilja, den 6 år gamle hoppa til Oddmund, er ein god køyrehest, og Martin ville gjerne prøve ho i to-spann ilag med Rossa, hoppa til Kristin. Rossa, 9 år gammal, er vand med å køyre i to-spann, og dette gjekk veldig greit. Faktisk så greit at Martin etterpå spente dei føre i eit fire-spann, ilag med vallakane til Kristin, Tjalve og Birk, 8 og 11 år gamle. Dette var moro for alle kursdeltakarane, det er ikkje ofte ein hverken ser eller er med å køyrer fire-spann.

Denne køyringa med to- og fire-spann var eit forarbeid til barnas dag på søndagen, der barna fekk høve til å sete på i fire-spann.

På Familiedagen på søndagen

 vart det etter kvart veldig fint ver, og det vart eit fint arrangement. Barna storkosa seg og rei tur etter tur inne i hallen, og dei synest det var kjempestas å få vere med i vogna når Martin køyrde fire-spann ute på markane og traktorvegane rundt om på garden.

Vi i laget rettar ei stor takk til Kristin (aktivitetsleiar), som stilte anlegget sitt til disposisjon denne helga! Takk også til alle andre som var med og gjorde denne helga til ei stor oppleving for mange!

På bilde nedanfor står Kristin til høgre for hesten sin, Emma til venstre.